10 பயணியின் சங்கீதங்கள்

பத்து கவிதைகள்

- Advertisement -

தேவனுடையதை
தேவனுக்கும்
ராயனுடையதை
ராயனுக்கும்
கொடுக்கச் சொல்கிறது தேவவாக்கியம்
தேவனும் ராயனும் சாத்தான்களாக
காலிப் பானைகளோடு
கண்ணீர் வடிக்கின்றனர்
பசியில் வேகும் ஜனங்கள்.

🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼

கடலலையில் மிதந்து சென்று
நுரையின் மேலிருக்கும்
அந்த வானத்தை கையில் ஏந்த
விரையும் காற்றின்
கனவுகள் உடைந்தபடியிருக்கிறது.

🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼

பொம்மையை கொஞ்சுகிறாள்
குழந்தையாய் மாறிவிட்டது
அவளை எல்லோரும்
பைத்தியக்காரி என்கிறார்கள்.

🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼

கோடுகளை அடுக்கடுக்காக தீற்றுகின்றேன்
ஓவியங்கள் உருவம் பெறுகின்றன
உயிரூட்ட
என் ரத்தத்தை வண்ணம் பூசுகிறேன்.

🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼

பழைய புதிய பூட்டுகளுக்குச்
சாவிகள் வைத்திருப்பவன்
சந்தையில் இருந்தான்
ஆயிரம் பூட்டுகள்
ஆயிரம் சாவிகள்
அவனிடம் இருந்தன
மரண ஜனன வீடுகளின் பூட்டுகளுக்கான
சாவிகள் மட்டும் இல்லையென்றான்.

🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼

மண்ணைத் தின்று மகா வீரர் வாழ்ந்திருக்கலாம்
புல்லைத் தின்று புத்தர் பொழச்சிருந்திருக்கலாம்
கறி தின்பதை என்னவோ
எங்களால் தவிர்க்கமுடியாது.

🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼

குளிர் காற்றில் நடுங்குகிறேன்
உடல் நழுவுகிறது
உயிர் மெல்ல
எட்டிப் பார்க்கிறது.

🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼

பயணத்தை துவங்குகிறேன்
போய் சேருமிடம் எங்கே ?
தெரியவில்லை
போய்த்தான் ஆகவேண்டும்.

🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼

பின்னோக்கி போகும்
உலகைப் பார்க்கிறேன்
முன்னோக்கி போகிறேன்
பின்னும் முன்னும் என்பன எவையென்று புரியாமல்.

🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼

பூ வீழ்கையில்
நீர் ஆடி
சலனமுறுகிறது
நீந்தும் குறுமீன்களின்
மத்தியில்
அதிர்வு பரவுகிறது
சிறு பதட்டம் உண்டாகி
நதி சற்று
நடுங்கி ஓய்கிறது.

+1
வசந்ததீபன்
தேனி மாவட்டம் போடிநாயக்கனூரைச் சேர்ந்தவர். தற்சமயம் சென்னை கூடுவாஞ்சேரியில் இருக்கிறார். ஹிந்தியில் முதுகலைப் பட்டம் பெற்றிருக்கிறார். மணிப்பூரில் நாகா மலைவாழ் மக்கள் பள்ளியில் ஏழு வருடங்கள் வேலை பார்த்தார். நீண்ட காலங்களாக கவிதைகள் , கதைகள் எழுதி வருகிறார். 2010 ல் " கொளிஞ்சி" எனும் கவிதைத் தொகுப்பு வெளியாகியுள்ளது. அன்பைத் தேடிக் கண்டடைவதே படைப்பாக்கமாக நம்புகிறார்.
guest
0 Comments
Inline Feedbacks
View all comments

தொடர்புடைய பதிவுகள்

படைப்புகள்

- Advertisement -
0
Would love your thoughts, please comment.x
()
x